जनता सचेत र जागरूक नभए फेरि सङ्कट आउन सक्छ : प्रचण्ड

काठमाडौँ । नेपाली कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ले जनता सचेत र जागरूक नभए देशमा पुनः ठूलो सङ्कट उत्पन्न हुनसक्ने चेतावनी दिएका छन् । आइतबार पोखरामा आयोजित एकता सन्देश सभामा उनले यस्तो दाबी गरेका हुन् । प्रचण्डले भने, ‘यदि जनता जागरूक भएनन्, राष्ट्रियताको भावना बलियो बनाएनन् भने देशमा फेरि सङ्कट आउन सक्छ।’ उनका अनुसार मुलुक अहिले गम्भीर राष्ट्रिय सङ्कटमा छ र त्यसबाट मुक्त गर्न सम्पूर्ण देशभक्त, वामपन्थी तथा कम्युनिस्ट शक्तिहरू एक जुट हुनु अत्यावश्यक छ ।

उनले एमाले र कांग्रेसको ‘दुई तिहाइ’बाट जनताले के हासिल गर्न सके भन्ने प्रश्न उठाउँदै, कांग्रेस–एमालेका कारण देश सङ्कटमा परेको टिप्पणी पनि गरे। प्रचण्डले भने, ‘हामीले राष्ट्र झण्डै धरापमा पुगेको देख्यौँ। सरकारमा हुँदा भ्रष्टाचारविरुद्ध लड्न खोज्यौँ, तर हटाइयो। भ्रष्टाचार र राष्ट्रिय स्वाधीनताका लागि लड्न शक्ति पुगेन।’

प्रचण्डले सुरु गरिएको ‘एकता अभियान’ चुनाव जित्ने उद्देश्यका लागि मात्र नभई राष्ट्रको रक्षा, स्वाधीनता संरक्षण र समृद्धिको आधार निर्माणका लागि रहेको स्पष्ट पारे । उनले भने ‘चुनाव त हामी जित्छौँ। तर राष्ट्र बचाउन जनताको राष्ट्रिय एकता अनिवार्य छ।’

• आइत, १४ मंसिर २०८२