उत्तराखण्ड केन्द्रविन्दु भएर ५.१ रेक्टरको भूकम्प, सुदूरपश्चिमका जिल्लाहरूमा पनि महसुस

काठमाण्डौँ । भारतको उत्तराखण्ड केन्द्रविन्दु भएर गएको भूकम्पको धक्का नेपालको सुदूरपश्चिम क्षेत्रमा पनि महसुस गरिएको छ। राति २२स्३८ बजे गएको यस भूकम्पको तीव्रता ५.१ रेक्टर स्केल मापन गरिएको छ।

भारतको उत्तराखण्ड राज्यस्थित नेपालको दार्चुलाबाट करिब १०० किलोमिटर पश्चिमलाई केन्द्रविन्दु बनाएर गएको उक्त भूकम्पका कारण दार्चुला, बैतडी, डडेल्धुरा लगायत सुदूरपश्चिम प्रदेशका विभिन्न जिल्लाहरूमा धक्का महसुस गरिएको थियो। रातिको समयमा अचानक घर हल्लिन थालेपछि त्रसित बनेका स्थानीय बासिन्दा घरबाहिर निस्किएका थिए।

भूकम्पबाट हालसम्म कुनै किसिमको मानवीय वा भौतिक क्षति भएको विवरण प्राप्त भएको छैन। स्थानीय प्रशासन तथा सुरक्षा निकायले सुदूरपश्चिमका भूकम्प प्रभावित क्षेत्रहरूमा सम्भावित क्षतिको अवस्था बुझ्ने कार्य भइरहेको जनाएको छ।