काठमाडौँ । चुनावी प्रचारका क्रममा प्रयोग गरिएको सवारीसाधनको ठक्करबाट चार वर्षीया बालिकाको ज्यान गएपछि राष्ट्रिय स्वतन्त्र पार्टी रास्वपाले घटनाप्रति गहिरो दुःख व्यक्त गर्दै आफ्नो आधिकारिक धारणा सार्वजनिक गरेको छ । पार्टीका महामन्त्री कविन्द्र बुर्लाकोटीले आज जारी गरेको विज्ञप्तिमा पीडित परिवारप्रति हार्दिक समवेदना प्रकट गर्दै आवश्यक राहत र सहयोगका लागि पार्टीले पहल गरिरहेको उल्लेख गरिएको छ । 

विज्ञप्तिमा भनिएको छ, यस घटनालाई पार्टीले अत्यन्त गम्भीरताका साथ लिएको छ। पीडित परिवारप्रति हाम्रो गहिरो समवेदना छ र घटनाको निष्पक्ष तथा वस्तुनिष्ठ छानबिनका लागि सम्बन्धित प्रशासनलाई पूर्ण सहयोग गर्ने प्रतिबद्धता व्यक्त गर्दछौँ

रास्वपाले कानुनी प्रक्रिया र पीडित परिवारलाई न्याय दिलाउने विषयमा कुनै पनि कसर बाँकी नराखिने स्पष्ट पारेको छ। साथै, चुनावी अभियानमा प्रयोग हुने सवारीसाधनको सञ्चालनमा उच्च सतर्कता अपनाउन र सुरक्षा संवेदनशीलतालाई प्राथमिकतामा राख्न सबै उम्मेदवार, पार्टी सदस्य र चालकलाई कडाइका साथ निर्देशनसमेत जारी गरिएको जनाएको छ।