काठमाडौँ । काठमाडौं महानगरपालिकाका मेयर बालेन शाहले पार्टी बनाउने भएका छन् । उनले देश विकास पार्टीको पुनर्गठन गरेर पार्टीको नेतृत्व गर्ने र चुनाबमा जाने तयारी गरेका हुन् । केही दिनअघि राष्ट्रिय स्वतन्त्र पार्टीसँग मिलेर चुनाबमा जाने विषयमा रास्वपा सभापति रवि लामिछानेसँग छलफल गरेका बालेन रास्वपासँगको सहकार्य सम्मानजनक नभएको निष्कर्षमा पुगेको र नयाँ पार्टी गठन गरेर निर्वाचनमा जाने तयारी गरेको स्रोतले बतायो ।

पार्टी गठन गर्नका लागि बालेनले धेरै प्रभावशाली व्यक्तिहरुसँग छलफल गरिरहेको समेत स्रोत बताउँछ । यसका लागि आज पनि बैठक राखिएको पत्रकार ऋषि धमलाले बताए । धमला आफैं पनि बालेनको चुनाबी छलफलको एक हिस्सा हुन् ।

धमलाका अनुसार बालेनले अहिले नयाँ पार्टी गठन गरेमा निर्वाचनमा जान मिल्दैन । निर्वाचन आयोगले आगामी प्रतिनिधि सभाका लागि दल दर्ताको काम पूरा गरिसकेको छ । त्यसैले उनले आयोगमा प्रतिनिधि सभा निर्वाचनका लागि यसअघि नै दर्ता भइसकेको पार्टीमार्फत चुनाबमा जाने तयारी गरेका छन् ।