काठमाडौँ । रसुवास्थित भोटेकोशी नदीमा गत भदौ १० गते आएको बाढीमा परी घाइते भएकामध्ये राष्ट्रिय ट्रमा सेन्टरमा उपचाररत ३८ जना निको भएर घर फर्किएका छन् । बाढीमा घाइते भएका कुल ५८ जनाको उद्धार गरी काठमाडौं ल्याइएको थियो ।

जिल्ला प्रहरी परिसर काठमाडौंका प्रवक्ता एवं प्रहरी उपरीक्षक दानबहादुर थापाका अनुसार उद्धार गरिएकामध्ये ५० जनालाई उपचारका लागि राष्ट्रिय ट्रमा सेन्टर भर्ना गरिएको थियो । तीमध्ये स्वास्थ्यमा सुधार आएपछि ३८ जनालाई डिस्चार्ज गरिसकिएको छ ।

हाल ट्रमा सेन्टरमा १२ जना घाइतेको उपचार भइरहेको छ। अस्पताल प्रशासनका अनुसार उपचाररत बिरामीहरूको अवस्था सामान्य रहेको छ र उनीहरूलाई साधारण शय्यामा राखी उपचार प्रबन्ध मिलाइएको छ ।