काठमाण्डौँ । बैतडीमा भएको बस दुर्घटनामा ज्यान गुमाउनेको संख्या १३ पुगेको छ । दुर्घटनाका घाइतेमधये गएराति थप पाँच जनाको ज्यान गएको प्रहरीले जनाएको छ । बैतडीको पुर्चौडी नगरपालिका–७ भवनेबाट बेहुली लिएर बझाङको सुनकुडातर्फ जाँदै गरेको सुप प्र ०२ ००१ ख १११९ नम्बरको बस हिजो बेलुकी पुर्चौडीको बडगाउँ मोडमा पल्टिएको थियो । 

दुर्घटनामा तत्कालै ८ जनाको जयान गएको थियो । राति थप पाँच जना घाइतेले ज्यान गुमाएका हुन् । मृतकमधये पाँच जनाको मात्रै सनाखत भएको जिल्ला प्रहरी कार्यालय बैतडीले जनाएको छ । बाँकी सनाखत गर्ने प्रयास भैरहेको प्रहरीको भनाइ छ । दुर्घटनामा अझै ३५ जना घाइते छन् । तीमध्ये केहीको अवस्था अझै गम्भीर रहेका छन् । घाइतेहरूको स्थानीय अस्पताल, जिल्ला अस्पताल र डडेलधुरा र धनगढीमा उपचार भैरहेको छ । 

उकालो सडकमा अत्यधिक भारका कारण बस दुर्घटनामा परेको हुनसक्ने प्रहरीको अनुमान छ । बस सडकबाट करिब २०० मिटर तल खसेको थियो ।