विगतका कमजोरी सुधार गरेर समयसँगै बदलिँदै काँग्रेस : सभापति थापा

काठमाडौँ । नेपाली काँग्रेसका सभापति गगन थापाले पार्टी समयअनुकूल सुधारिएको राजनीतिक शक्तिका रूपमा अघि बढिरहेको बताएका छन् । शुक्रबार सर्लाही ४ मा आयोजित निर्वाचनसम्बन्धी कार्यक्रममा बोल्दै उनले मतदातामाझ पार्टीको वर्तमान दिशा स्पष्ट पार्दै काँग्रेसले विगतका कमजोरीबाट पाठ सिकेर आफ्नो कार्यदिशा परिमार्जन गरेको उल्लेख गरे ।

बदलिँदो समय र जनअपेक्षाअनुसार पार्टीले नीतिगत तथा व्यवहारिक सुधारलाई प्राथमिकतामा राखेको उनको भनाइ थियो । सभापति थापाले वर्तमान काँग्रेस सुशासन सुदृढीकरण, भ्रष्टाचार नियन्त्रण तथा लामो समयदेखि कार्यान्वयन हुन नसकेका विकास र सुधारका एजेन्डा पूरा गर्ने लक्ष्यसहित अघि बढिरहेको बताए । अब पार्टी व्यवहारमै परिणाम देखिने काममा केन्द्रित रहने प्रतिबद्धता पनि उनले व्यक्त गरे ।