म्याग्दी ।  म्याग्दीको अन्नपूर्ण गाउँपालिकाले आफ्ना प्रमुख पर्यटकीयस्थलहरूलाई आन्तरिक आम्दानीको मुख्य स्रोत बनाएको छ। गाउँपालिकाले चालु आर्थिक वर्ष २०८३र०८४ मा पर्यटकीयस्थलहरूमा प्रवेश शुल्क संकलन तथा चिया पसल सञ्चालनका लागि ठेक्का लगाएर १ करोड ३० लाख ६६ हजार ५ सय ५५ रुपैयाँ आम्दानी गरेको छ ।

गाउँपालिकाभित्र रहेका पुनहिल, पाउद्वार, रातोपानी कुण्ड र रुप्से झरनाको आय ठेक्का सम्झौता भइसकेको प्रमुख प्रशासकीय अधिकृत कपिल पाण्डेले जानकारी दिए। उनका अनुसार भुरुङ तातोपानी कुण्डमा प्रवेश शुल्क उठाउन र चमेनागृह सञ्चालनका लागि न्यूनतम ९ लाख ५० हजार रुपैयाँ कायम गरेर आह्वान गरिएको ठेक्काको प्रस्ताव हाल मूल्यांकनको चरणमा छ ।

अन्नपूर्ण गाउँपालिका ६ स्थित पुनहिलमा प्रवेश शुल्क र चिया पसल सञ्चालनका लागि घोडेपानीको सन्नी होटलले ७१ लाख ५ सय रुपैयाँमा ठेक्का सम्झौता गरेको छ। त्यस्तै पाउद्धार तातोपानी कुण्डको ५० लाख १० हजार, रातोपानी कुण्डको ४ लाख ५ सय र रुप्से झरनामा प्रवेश शुल्क संकलनका लागि ५ लाख ५५ हजार ५ सय ५५ रुपैयाँमा ठेक्का सम्झौता भएको छ ।