फर्किएन देउवाको मन, कुनै पनि चुनावी सभामा सहभागी नहुने

काठमाडौँ । नेपाली कांग्रेसका निवर्तमान सभापति शेरबहादुर देउवा पछिल्लो समय कुनै पनि चुनावी गतिविधिमा सहभागी नहुने भएका छन् । देउवाको सचिवालयले हालसम्म देउवा कुनै पनि चुनावी सभा, कार्यक्रम वा अभियानमा सहभागी हुने कुनै योजना नरहेको स्पष्ट पारेको छ ।

केही सञ्चारमाध्यममा देउवा चुनावी अभियानमा सक्रिय हुने तयारीमा रहेको भन्ने समाचार प्रकाशित भएपछि सचिवालयले त्यसप्रति ध्यानाकर्षण गराउँदै यस्ता खबरहरू निराधार भएको जनाएको हो । सचिवालयका अनुसार देउवा हाल कुनै पनि राजनीतिक कार्यक्रममा सहभागी हुने तयारीमा छैनन् ।

‘चुनावी सभा वा अन्य कुनै पनि कार्यक्रममा जाने कुनै योजना छैन,’ देउवाको सचिवालयले स्पष्ट शब्दमा जनाएको छ । सचिवालयले सार्वजनिक रूपमा यस्तो धारणा राखेपछि देउवाको आगामी भूमिकाबारे पार्टीभित्र र बाहिर विभिन्न अड्कलबाजी पनि रोकिएको छ ।

चार पटक प्रधानमन्त्री भइसकेका देउवा कांग्रेसको संगठन विस्तार, सत्ता सहकार्य र गठबन्धन राजनीतिमा निर्णायक भूमिका खेल्दै आएका नेता हुन् । तर, गत पुस अन्तिम साता सम्पन्न विशेष महाधिवेशनबाट कांग्रेसको नेतृत्व परिवर्तन भएसँगै देउवा औपचारिक रूपमा पार्टी नेतृत्वबाट बाहिरिएका छन् ।