हुम्ला । नेपाल र चीनको सिमाना छुट्याउने सीमास्तम्भको अनुगमन गर्न सुरक्षाकर्मीलाई कठिनाइ हुने गरेको छ । स्थानीयदेखि संङ्घीय सरकारस्तरमा हुम्ला क्षेत्रमा पर्ने जति पनि दुई देशविचका सीमास्तम्भ रहेको भए पनि कुनै पनि सिमास्तम्भसम्म पुग्ने सडक निर्माण नगरिएको कारण सशस्त्र प्रहरीलगायत सुरक्षाकर्मीलाई अनुमगन गर्न कठिनाइ भएको हो ।

नेपाल र चीन विचको सिमाना छुट्याउने सीमास्तम्भ नम्बर तीनदेखि बाह्रसम्म दश वटा सीमास्तम्भहरु रहेको र बाह्र नम्बरको सीमास्तम्भमा पुग्न आधासम्म सडक निर्माण गरिएको बाहेक अन्य सवै सीमास्तम्भ सडक नपुगेको सशस्त्र प्रहरी बल ४४ नम्बर गुल्म सिमकोटका सशस्त्र प्रहरी नायव उपरिक्षक नन्दबहादुर साउदले बताए ।

हिल्सावाट पश्चिमतर्फका सीमास्तम्भ नम्बर तीन र चारमा पुग्न सुरक्षाकर्मीहरुलाई बिहान चार बजे हिँडेर गयो भने बेलुका दश वजे मात्र हिल्सा फर्किन सकिन्छ । सडक त के घोरेटो बाटो समय नभएको कारण जिपिएस हेर्दै जानु पर्ने वा पहिला गई सकेका सुरक्षाकर्मीलाई अगाडी लगाएर जानु पर्ने बाध्यता सुरक्षाकर्मीहरुलाई रहेको छ ।