बङ्गलादेशमा युनुस युगको अन्त्य, रहमानको शपथ आज

काठमाडौँ । बङ्गलादेशका अन्तरिम नेता मोहम्मद युनुसले निर्वाचित सरकारलाई सत्ता हस्तान्तरण गर्नुअघि सोमबार राष्ट्रका नाममा बिदाइ सम्बोधन गर्दै पदबाट राजीनामा दिएका छन्। नोबेल शान्ति पुरस्कार विजेता ८५ वर्षीय युनुसले आफ्नो कार्यकाल समाप्त भएको घोषणा गर्दै अब आउने सरकारले लोकतन्त्र र मौलिक अधिकारको रक्षा गर्ने विश्वास व्यक्त गरे ।

सन् २०२४ अगस्टमा शेख हसिनाको सरकार अपदस्थ भएपछि युनुसले अन्तरिम नेतृत्व सम्हालेका थिए। बिदाइ सम्बोधनका क्रममा उनले भने, आजदेखि अन्तरिम सरकारको कार्यभार अन्त्य भएको छ । हाम्रो देशका युवाहरूले देशलाई दुष्ट शासकको पकडबाट मुक्त गरे र यो ठूलो मुक्तिको दिन थियो।

गत साता भएको निर्वाचनमा बङ्गलादेश नेसनलिस्ट पार्टी बिएनपीले ठूलो विजय हासिल गरेको छ । युनुसले बिएनपी नेता तारिक रहमानलाई बधाई दिँदै अबको सरकारको नेतृत्व उनकै काँधमा पुगेको बताए । निर्वाचन आयोगका अनुसार ३०० सदस्यीय संसद्‌मा बिएनपी गठबन्धनले २१२ सिट र जमातएइस्लामी नेतृत्वको गठबन्धनले ७७ सिट जितेका छन् ।