कोशी र तराईमा तनाव बढेपछि पूर्वराजा ज्ञानेन्द्र शाहको गम्भीर चिन्ता : जारी गरे सद्भाव र एकताको विशेष सन्देश

काठमाडौँ । पूर्वराजा ज्ञानेन्द्र शाहले सुनसरीमा भएको हिंसात्मक घटनाप्रति दुःख व्यक्त गर्दै सामाजिक सद्भाव, एकता र आपसी सहिष्णुता कायम राख्न सबै नेपालीलाई आग्रह गरेका छन् ।

बिहीबारजारी गरेको सन्देशमा उनले सुनसरीका केही गाउँबस्तीमा भएको द्वन्द्व र विवादका कारण जनधनको क्षति भएको तथा त्यसको प्रभाव कोशी क्षेत्र र तराईका अन्य भूभागसम्म फैलिएकोप्रति चिन्ता व्यक्त गरेका हुन् ।

पूर्वराजा शाहले नेपाल विभिन्न समुदायबीचको सामाजिक सद्भाव र सहअस्तित्वका लागि परिचित देश भएको उल्लेख गर्दै यस्ता अवाञ्छित घटना मुलुकको मौलिक मूल्य र मान्यताविपरीत रहेको बताएका छन् । उनले देशका सबै समुदायलाई आपसी समझदारी, संयम र एकता कायम राख्दै शान्तिपूर्ण वातावरण निर्माणमा योगदान दिन आग्रह गरेका छन् ।