आइतबारको बिदा नहट्ने, निजी क्षेत्रमा लागू गराउन सरकारको पहल

काठमाडौँ । सरकारले आइतबारको सार्वजनिक बिदा फिर्ता नलिने स्पष्ट पारेको छ। सरकारका प्रवक्तासमेत रहेका शिक्षा तथा खेलकुदमन्त्री सस्मित पोखरेलले आइतबारको बिदा तत्कालका लागि केहीलाई असहज र अलोकप्रिय लागे पनि यसको सकारात्मक प्रभाव दीर्घकालमा देखिने भएकाले निर्णयबाट सरकार पछि नहट्ने बताएका हुन् ।

उनले आइतबारको बिदाबारे विभिन्न असन्तुष्टि आएको जानकारी आफूलाई भए पनि त्यसको पूर्वानुमान गर्दागर्दै सरकारले निर्णय गरेको बताए । मन्त्री पोखरेलका अनुसार अन्तर्राष्ट्रिय अभ्यासले साप्ताहिक दुई दिनको बिदाले कार्यसम्पादनमा सुधार ल्याएको देखिएकाले नेपालमा पनि सोही अभ्यास लागू गर्न खोजिएको हो ।