चुनावमा उम्मेदवार बन्नेबारे निर्णय गरेको छैन : मन्त्री खरेल

काठमाडौँ । सञ्चार तथा सूचना प्रविधिमन्त्री जगदीश खरेलले आफूले निर्वाचनमा उम्मेदवारी दिने वा नदिनेबारे कुनै निर्णय नगरेको स्पष्ट पारेका छन् । राष्ट्रिय स्वतन्त्र पार्टीबाट उम्मेदवारी दिने चर्चा भइरहेका बेला मन्त्री खरेलले अहिलेसम्म सो विषयमा कुनै निर्णय नलिएको बताएका हुन् । बुधबार नेपाल पत्रकार महासंघ भक्तपुर शाखाले आयोजना गरेको कार्यक्रममा बोल्दै उनले आफू कुनै पनि राजनीतिक दलमा प्रवेश नगरेको पनि बताए ।

उनले भने, ‘म यहाँहरूलाई आज स्पष्ट पार्न चाहन्छु, मैले अहिलेसम्म चुनावमा उठ्ने वा नउठ्ने भन्ने केही पनि निर्णय गरेको छैन । दोस्रो कुरा यहाँहरूलाई म स्पष्ट पार्न चाहन्छु, म आजको दिनसम्म कुनै पनि पार्टीमा प्रवेश गरेको छैन, गएको छैन। वार्ता वा छलफल गरेको छैन ।’

उनले आफूले कसैलाई आउँछु वा जान्छु भनेर केही नबोलेको उल्लेख गरे । ‘आउँछु पनि भनेको छैन। जान्छु भनेको छैन। मैले केही पनि भनेको छैन। र, मेरो अहिले सम्पूर्ण ध्यान चुनाव गराउन रहेको छ,’ उनले भने । आफूले निर्वाचनका लागि कुनै पनि पार्टीसँग छलफल नगरेको विषयमा सञ्चारमाध्यममा फरक समाचार आएको भन्दै उनले असन्तुष्टि व्यक्त गरे ।