काठमाडौँ । बिहीबार बसेको प्रतिनिधिसभा बैठकमा विभिन्न दलका सांसदहरूले विपद् व्यवस्थापन, बजारमा देखिएको खाना पकाउने ग्यासको अभाव, दुर्गम क्षेत्रको स्वास्थ्य अवस्था र पूर्वाधार निर्माणका विषयलाई लिएर सरकारको कडा ध्यानाकर्षण गराएका छन् ।

राष्ट्रिय स्वतन्त्र पार्टीका सांसद यज्ञमणि न्यौपानेले रसुवा विपद्का लागि वैदेशिक सहायता स्वरूप आएका राहत सामग्रीहरू त्रिभुवन अन्तर्राष्ट्रिय विमानस्थलको कार्गोमा अलपत्र अवस्थामा थन्किएको भन्दै आपत्ति जनाए ।

विमानस्थलको स्थलगत अवलोकनपछि संसद्‌मा बोल्दै उनले भन्सार र प्रक्रियागत झन्झटका कारण लत्ताकपडालगायतका सहायता सामग्री सम्बन्धित पीडितसम्म पुग्न नसकेको बताए। उनले माग नआएको बहानामा राहत सामग्री खेर जान नदिन र रसुवालगायत प्रभावित क्षेत्रमा तत्काल आपूर्ति मिलाउन सरकारसँग माग गरे।