पार्टी एकताकै पक्षमा छु, निकास ननिस्किँदासम्म लागिरहन्छु : डा. शेखर कोइराला

काठमाडौँ । नेपाली कांग्रेसका नेता डा. शेखर कोइरालाले आफू पार्टी एकताको पक्षमा निरन्तर आवाज उठाइरहेको बताएका छन् । विशेष महाधिवेशन उद्घाटनको संघारमा भिडियो सन्देश जारी गर्दै उनले पार्टी विभाजन नहोस् भन्नेमा आफू सचेत रहेको स्पष्ट पारेका हुन् । उनले पार्टी रूपान्तरणको अभियानमा आक्रोश र अधैर्य भएर अघि नबढ्ने अडान दोहोर्‍याए । व्यक्तिगत पद र हैसियतप्रति आफ्नो मोह नरहेको पनि उनले बताए ।

उनले भने, ‘मेरो कतिपय शैलीहरूसँग साथीहरू असहमत भएको म बुझ्थेँ । तर पनि म काँग्रेसको रूपान्तरण अभियानमा आक्रोश र अधैर्य भएर अगाडि बढ्न चाहिनँ । म यहाँ प्रस्ट भन्न चाहन्छु, मेरो निजी महत्त्वाकाङ्क्षा केही छैन । मलाई मन्त्री, महामन्त्री हुने लोभले विगतमा कहिले आकर्षित गरेन। यस्ता अवसरहरू आए तर मैले रुचि देखाइन । त्यस्तै सभापति, प्रधानमन्त्री हुने कुराले मलाई लोभ्याउँदैन ।’

डा। कोइरालाले आफ्नो पारिवारिक शिक्षालाई जीवन दर्शनका रूपमा अङ्गीकार गरेको बताए । यही दर्शनका आधारमा पार्टीको समग्र एकताको पक्षमा शान्त आवाज उठाइरहेको उनको भनाइ छ ।