काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले कुनै पनि तर्क वा बाहनामा निर्वाचन सार्ने काम नगर्न सरकारलाई चेतावनी दिएका छन् । बागमती प्रदेश कमिटीले काठमाडौँको भृकुटीमण्डपमा आयोजना गरेको सन्देश सभालाई सम्बोधन गर्दै उनले भने, हामी यो देशलाई संकटबाट मुक्त गर्ने उद्देश्यका साथ एकीकृत भएका छौँ । सहज ढंगले निर्वाचन सम्पन्न होस् । सरकारलाई हामी भन्न चाहन्छौं, तपाईंहरू कुनै तर्क र बाहनामा निर्वाचन सार्ने दुस्साहस नगर्नुहोला।

प्रचण्डले यसअघि संविधान केही हदसम्म मिचिएको भए पनि देशको अवस्थालाई हेरेर आफूहरूले चुपचाप सहयोग गरेको बताए। तर उनले स्पष्ट पारे, यदि सरकारले फेरि निर्वाचनको मिति सार्ने वा धकेल्ने काम गर्यो भने संविधान मिचिन्छ र हामी चुप लागेर बस्ने छैनौं। केही अहंकारी वा दम्भीहरूले धम्की दिने प्रयास गर्न सक्छन्, तर हामी शान्तिपूर्ण ढंगले निर्वाचन सम्पन्न गराउन चाहन्छौं।

उनले ६ महिना वा एक वर्ष निर्वाचन मिति सार्ने हल्ला पनि आफूले सुनेको बताए। यदि सरकारले यो हल्ला नजरअन्दाज गरेर मिति सार्ने काम गर्यो भने देश फेरि दुर्घटनामा पर्छ। अबको दुर्घटनामा नेपाली कम्युनिस्ट पार्टी रमिते हुने छैन।