काठमाडौँ । जर्मनीको उत्तरी सहर स्टेडस्थित एक बाल तथा मातृ कल्याण केन्द्रमा सोमबार दिउँसो भएको अन्धाधुन्ध गोली प्रहारमा परी ६ जनाको मृत्यु भएको छ । आफ्नी तीन महिने छोरीको संरक्षणको विषयलाई लिएर भएको विवादका कारण एक बन्दुकधारीले उक्त विभत्स हत्याकाण्ड मच्चाएको जर्मन प्रहरीले जनाएको छ ।

ह्याम्बर्ग नजिकै रहेको उक्त कल्याणकारी संस्थामा कार्यरत चार महिला र दुई पुरुष गरी ६ जना कर्मचारीको गोली लागेर मृत्यु भएको हो । घटनामा अन्य केही व्यक्ति घाइते समेत भएका छन् ।

जर्मन अधिकारीका अनुसार गोली चल्ने समयमा ती तीन महिने शिशु र उनकी आमा कार्यालय भित्रै रहे पनि उनीहरूलाई कुनै चोटपटक लागेको छैन । घटना लगत्तै सक्रिय भएको प्रहरीले मुख्य संदिग्ध बन्दुकधारीसहित तीन जनालाई नियन्त्रणमा लिएको छ । हाल सर्वसाधारणका लागि कुनै सुरक्षा खतरा नरहेको प्रहरीले स्पष्ट पारेको छ ।