खण्डहर बनाइएको घर हेर्न पुगेका केपीले भने : अपराधिको संरक्षक गृहमन्त्री हुन्

काठमाडौँ । नेकपा एमालेका अध्यक्ष तथा पूर्वप्रधानमन्त्री केपी शर्मा ओली आज भक्तपुरको बालकोटस्थित आफ्नो जलेको घर अवलोकन गर्न पुगेका छन् । भदौ २४ गते जेनजी आन्दोलनका क्रममा आगजनी भएर खण्डहर बनेको घर हेर्न उनी बुधबार बालकोट पुगेका हुन्। सुरुमा गेटबाटै केही बेर जलेको घर हेरेका ओली पछि घरको बार्दली हुँदै भित्रका कोठासम्म पुगेका थिए । ओलीसँगै उनकी धर्मपत्नी राधिका शाक्य र पार्टीका केही कार्यकर्ता पनि थिए। आगलागीपछिको अवस्थामा उनीहरू हाल भक्तपुरकै गुण्डुमा अस्थायी रूपमा बस्दै आएका छन् ।

यसअघि असोज ४ गते राधिका शाक्य एक्लै घर हेर्न पुगेकी थिइन् । उनले उक्त घरलाई सङ्ग्रहालय बनाउने योजना रहेको तर अब त्यसको सट्टा खरानीमात्र बाँकी रहेको बताएकी थिइन् । शाक्यले भनिन्, ुयो घर व्यवस्थापन गर्न मलाई ६ महिना लागेको थियो। एउटा कोठामा देशबाट प्राप्त सम्मान र मायाका चिनोहरू थिए भने अर्को कोठामा चीन, कम्बोडिया, भारत, भियतनाम, जापानलगायतका प्रधानमन्त्रीहरूले दिएका अमूल्य सामग्रीहरू दराजमा सजाएर राखिएको थियो।ु

केपी ओलीले आन्दोलनको नाममा योजनाबद्ध ढङ्गले आफ्ना सम्पत्तिहरूमा क्षति पुर्‍याइएको आरोप लगाएका छन् । बालकोट निवासमै सञ्चारकर्मीहरूसँग कुरा गर्दै ओलीले आफूलाई पटक–पटक लक्षित गर्दै आक्रमण गरिएको दाबी गरे । ‘देशभरि नै एमाले पार्टी कार्यालयहरू जलाइएका छन् । यसको तयारी पहिले देखिनै गरिएको थियो र खास गरी एमालेलाई टार्गेट गरिएको थियो,’ उनले भने ।

ओलीले सरकारलाई घटनाका दोषीहरूलाई कारबाही गर्न नचाहेको आरोप लगाउँदै भने, ‘सबै प्रमाण हुँदाहुँदै पनि सरकार अपराधीहरूलाई जोगाउन लागिपरेको छ । गृहमन्त्रीको अभिव्यक्तिबाट सरकारको मनसाय प्रस्ट देखिन्छ ।’ उनले आन्दोलनका क्रममा अदालतका मुद्दाका मिसिलहरू, सिंहदरबारका ऐतिहासिक दस्तावेज, उद्योग(व्यवसाय, स्कुल र निजी सम्पत्तिहरू जलाइएको उल्लेख गर्दै यो घटनालाई ‘नेपालविरुद्धको भयावह षड्यन्त्र’ भएको बताए ।