मध्यपूर्वको युद्धले एसियामा इन्धन सङ्कट : बङ्गलादेशमा सेना परिचालन, म्यान्मारमा सवारी चलाउन आलोपालो प्रणाली

काठमाडौँ । मध्यपूर्वमा जारी युद्धका कारण अन्तर्राष्ट्रिय बजारमा कच्चा तेलको मूल्य तीव्र रूपमा बढेपछि एसियाका विभिन्न देशहरूमा इन्धनको गम्भीर अभाव र जनआक्रोश देखिन थालेको छ । विशेषगरी बङ्गलादेशमा स्थिति निकै तनावपूर्ण बनेपछि सरकारले प्रमुख तेल डिपोहरूको सुरक्षाका लागि सैनिक नै तैनाथ गर्नुपरेको छ ।

आफ्नो ऊर्जा आवश्यकताको झन्डै ९५ प्रतिशत आयातमा निर्भर रहेको यस मुलुकमा इन्धन अभावको त्रासले राजधानी ढाकासहित देशभरका पेट्रोल पम्पहरूमा सवारी साधनको लामो लाम लागेको छ । आपूर्ति सहज नहुँदा आक्रोसित चालकहरूले पम्पमा तोडफोड समेत गरेका छन् भने दक्षिणी जिल्ला झेनैदाहमा इन्धन भर्ने विषयमा भएको झडपमा एक युवकको मृत्यु समेत भएको छ । २५ वर्षीय युवकको मृत्युपछि उत्तेजित भीडले बसहरूमा आगजनी गरेपछि सुरक्षा व्यवस्था कडा बनाउन पेट्रोल पम्प वरपर प्रहरी गस्ती बढाइएको छ ।