मिथिला माध्यमिकी परिक्रमा आजदेखि सुरु

काठमाडौँ । महाशिवरात्रि सम्पन्न भएसँगै मिथिला माध्यमिकी परिक्रमा आजदेखि सुरु भएको छ । १५ दिने धार्मिक यात्रासँगै महोत्तरीमा यात्रीको स्वागत र व्यवस्थापनको तयारी गरिएको छ । यात्री बिहीबार मटिहानीबाट महोत्तरी प्रवेश गर्नेछन् ।

यात्राक चौथो दिन महोत्तरी प्रवेश गर्ने यात्री मटिहानी, जलेश्वर, मडै, ध्रुवकुण्ड र कञ्चनवनमा पाँच रात बस्नेछन् । ती स्थानमा बास, खाना, स्वास्थ्य सेवा र सुरक्षाको व्यवस्था मिलाइएको छ ।

प्रमुख जिल्ला अधिकारी इन्द्रदेव यादवका अनुसार यात्रालाई व्यवस्थित बनाउन स्थानीय तह, मठमन्दिर र प्रशासनबीच समन्वय भइरहेको छ । मटिहानी, जलेश्वर, मडै, ध्रुवकुण्ड र कञ्चनवनका स्थानीय तहले यात्राका लागि आवश्यक तयारी गरेका छन् । कञ्चनवनमा होली महोत्सव पनि आयोजना गरिनेछ ।