काठमाण्डौँ । विश्व प्रतिष्ठित कान्स फिल्म महोत्सवको ७९औँ संस्करणमा नेपाली फिल्म ‘एलिफेन्ट्स इन द फग’ छनोट भएको छ । कान्सअन्तर्गतको विधा ‘अन सर्टेन रिगार्ड’ यो फिल्म छानिएको हो । अविनाश विक्रम शाह निर्देशित यो फिल्म मुख्य प्रतिस्पर्धापछि प्रमुख मानिने विधामा नेपालबाट छनोट हुने पहिलो फिल्म समेत हो। ‘अन सर्टेन रिगार्ड’ले युवा निर्देशक र फरक कथावाचकहरूलाई समेट्छ । 

कान्समा मेन्टरसिप पाएको यो फिल्म अब उत्कृष्ट फिल्मका लागि ‘अन सर्टेन रिगार्ड प्राइज, उत्कृष्ट निर्देशक र स्पेसल जुरी प्राइजका लागि भिड्नेछ। यस फिल्मले हात्तीको आक्रमणबाट आक्रान्त बस्तीको एक परिवारको कथा भन्छ । हात्तीका कारण खेप्नुपरेको पीडासँगै आमा र छोरीको सम्बन्ध देखाइएको। जुन परिवारले यौनिक तथा अल्पसंख्यक समुदायको प्रतिनिधित्व गर्छ ।

फिल्ममा अल्पसंख्यक समुदायकै कलाकारसहित आकांक्षा कार्की, पुष्पा थिङ, दीपिका यादव, जस्मिन विश्वकर्मा, शान्ति गिरी, गौरी मल्ल, माओत्से गुरुङ, सञ्जय गुप्ता दुरा, महिमा नवबाग लगायतको अभिनय छ । दुई नेपाली कम्पनी अन्डरग्राउन्ड टकिज नेपाल र जयन्ती क्रियसन्ससँगै फिल्ममा फ्रान्स, जर्मनी, ब्राजिल र नर्वेको लगानी छ । यसअघि शाहको सर्ट फिल्म ‘लोरी’ पनि कान्समा छनोट भइसकेको छ। जसले कान्सको ७५ औं संस्करणमा स्पेशल मेस्सन जित्दै इतिहास रचेको थियो ।