एनपीएल : वर्षाले ५ ओभरमा छोट्याइएको खेलमा सुदूरपश्चिममाथि विराटनगरको रोमाञ्चक र शानदार जित

काठमाडौँ । नेपाल प्रिमियर लिग एनपीएल अन्तर्गत शनिबार कीर्तिपुरस्थित त्रिवि क्रिकेट मैदानमा सम्पन्न दोस्रो खेलमा विराटनगर किंग्सले सुदूरपश्चिम रोयल्सविरुद्ध शानदार जित हात पारेको छ। वर्षा र भिजेको आउटफिल्डका कारण ढिला गरी सुरु भई ५,५ ओभरमा छोट्याइएको रोमान्चक खेलमा विराटनगरले सुदूरपश्चिम रोयल्सलाई पराजित गर्दै महत्त्वपूर्ण जित दर्ता गरेको हो ।

टस हारेर पहिले ब्याटिङको निम्तो पाएको कप्तान सन्दीप लामिछाने नेतृत्वको विराटनगर किंग्सले निर्धारित ५ ओभरमा २ विकेट गुमाउँदै १०५ रनको विशाल योगफल खडा गरेको थियो ।

विराटनगरका लागि ओपनिङमा आएका श्रीलङ्कन ब्याटर शेहान जयसूर्याले मात्र ११ बलमा २ चौका र ५ छक्काको मद्दतले ३९ रनको आक्रामक पारी खेले। सुदूरपश्चिमका लागि एनपीएल डेब्यु गरेका स्पिनर थरिन्दु रत्नायाकेको पहिलो ओभरमै जयसूर्याले ५ छक्का प्रहार गरेपछि विराटनगरले पहिलो ओभरमै ३५ रन जोड्दै विष्फोटक सुरुवात गरेको थियो ।