पोखरा अन्तर्राष्ट्रिय विमानस्थल भ्रष्टाचार मुद्दा : अख्तियारद्वारा सर्वोच्चमा रिट दर्ता

काठमाडौँ । पोखरा अन्तर्राष्ट्रिय विमानस्थल निर्माणसँग जोडिएको भ्रष्टाचार प्रकरणमा विशेष अदालतको धरौटी आदेशप्रति असन्तुष्टि जनाउँदै अख्तियार दुरुपयोग अनुसन्धान आयोग सर्वोच्च अदालत पुगेको छ । उक्त प्रकरणमा संलग्न निर्माण कम्पनी चाइना सीएमसी इन्जिनियरिङका प्रतिनिधिलगायतलाई थुनामै राखेर पुर्पक्ष गर्न माग गर्दै अख्तियारले मंगलबार चैत २४ निवेदन दर्ता गरेको हो । आरोपितहरूलाई साधारण तारिख र न्यून धरौटीमा छाडिएको भन्दै उक्त आदेश बदर गरी थुनामा राख्न माग गरिएको छ ।

मुख्य आरोपितमध्ये निर्माण कम्पनीका प्रतिनिधि रबिन रिजाललाई २५ लाख रुपैयाँ, रतीशचन्द्र लाल सुमनलाई ५ लाख रुपैयाँ र भीमप्रसाद आचार्यलाई २ लाख ५० हजार रुपैयाँ धरौटीमा छाडिएको थियो। यी धरौटी रकम न्यून रहेको दाबी गर्दै अख्तियारले आदेश उल्ट्याउन माग गरेको छ । त्यस्तै, साधारण तारिखमा छाडिएका प्रतिवादीहरू डा। पुण्यराज शाक्य, हरिबहादुर खड्का र रोशन चित्रकारलाई पनि थुनामै राखेर मुद्दाको पुर्पक्ष गर्न माग गरिएको छ ।