बालेन र रविको गठजोडबारे प्रदीप ज्ञवालीको टिप्पणी : तिलस्मी तत्वको खोजीले कहीँ पुर्‍याउँदैन

काठमाडौँ । नेकपा एमालेका नेता प्रदीप ज्ञवालीले विचार मिल्नेहरू एकै ठाउँ उभिनु स्वाभाविक र सकारात्मक भएको बताएका छन् । राष्ट्रिय स्वतन्त्र पार्टीका सभापति रवि लामिछाने, काठमाडौं महानगरका मेयर बालेन शाह र ऊर्जामन्त्री कुलमान घिसिङ लगायतले गरिरहेको एकता वार्ताप्रति टिप्पणी गर्दै ज्ञवालीले यसमा अनावश्यक ‘तरङ्ग’ सिर्जना गर्न खोजिएको बताएका छन् ।

उनले यो मिलनले यस्तै ‘तारणहार’ जन्माउँछ र देशले मुक्ति पाउँछ भन्ने भ्रान्ति फैलाउन खोजिएको बताए । ‘तर यस्तो तिलस्मी तत्वको खोजीले मुलुकलाई कहीँ पनि पुर्याउँदैन’ उनले भनेका छन्, ‘देश बनाउनमा व्यक्तिको भूमिका हुँदैन भन्ने होइन, तर देश बन्ने भनेको अन्ततोगत्वा विचार, संस्था, प्रणाली र सामूहिकताले हो ।’

ज्ञवालीले विचार मिल्नेहरू एकै ठाउँ उभिनु स्वाभाविक र सकारात्मक भए पनि त्यसलाई लिएर अनावश्यक ‘तरङ्ग’ सिर्जना गर्न खोजिएकोप्रति आपत्ति जनाएका छन् । ‘विचार मिल्नेहरू एकै ठाउँ उभिनु राम्रो हो । उसो त, विचार मिलेको हो कि स्वार्थ समयले नै बताउला,’ उनले भनेका छन् । उनले सिंहदरबार जलाउने वा जल्दा उत्सव मनाउने प्रवृत्तिबाट आएका शक्तिहरू लोकतान्त्रिक प्रतिस्पर्धामार्फत सिंहदरबार पुग्न खोज्नु सकारात्मक भएको पनि बताए ।