प्रधानमन्त्री सुशीला कार्कीको चुनावी सन्देश: 'मतदान केन्द्र पुगौँ, आफ्नो भविष्य आफैँ चुनौँ'

काठमाडौँ । प्रधानमन्त्री सुशीला कार्कीले आज भइरहेको प्रतिनिधिसभा निर्वाचनमा अनिवार्य रूपमा आफ्नो मताधिकार प्रयोग गर्न आम मतदाताहरूलाई हार्दिक आग्रह गरेकी छन् । उनले आज सामाजिक सञ्जालमार्फत एक सन्देश जारी गर्दै सबै नागरिकलाई मतदान केन्द्र पुगेर आफ्नो अधिकार प्रयोग गर्न आह्वान गरेकी हुन् ।

प्रधानमन्त्री कार्कीले आफ्नो सन्देशमा भनेकी छन्, “आदरणीय दिदीबहिनी तथा दाजुभाइहरू, आज फागुन २१ गते, अनिवार्य रूपमा मतदान केन्द्र पुगी आफ्नो अमूल्य मताधिकार प्रयोग गर्न हार्दिक आग्रह गर्दछु।” उनले मतदाताको प्रत्येक मत मुलुकको भविष्य र समृद्धिको मार्ग निर्धारणका लागि अत्यन्तै महत्त्वपूर्ण हुने उल्लेख गरेकी छन् ।

निर्वाचनलाई शान्तिपूर्ण र मर्यादित बनाउन मतदाताहरूले देखाएको संयम र समझदारीप्रति प्रधानमन्त्रीले विशेष आभार समेत प्रकट गरेकी छन् । मतदान कार्य देशभर उत्साहजनक रूपमा अगाडि बढिरहेको सन्दर्भमा प्रधानमन्त्रीको यो अपिलले मतदाताहरूमा थप हौसला थपेको छ ।