काठमाण्डौँ । तेक्वान्दो खेलसँग जीवनको तीन दशकभन्दा बढी समय समर्पण गरेका युवा उद्यमी तथा समाजसेवी राम गिरी नेपाल तेक्वान्दो संघको केन्द्रीय उपाध्यक्षमा मनोनीत भएका छन् । संघको सौराहामा सम्पन्न पाँचौँ अधिवेशनपछि अध्यक्ष दीपराज गुरुङको नेतृत्वमा गठन गरिएको नयाँ कार्यसमितिले गिरीलाई उपाध्यक्षको जिम्मेवारी सुम्पिएको हो ।

गिरीले सन् १९९२, २०४९ सालमा छाउनीस्थित बालग्राम तेक्वान्दो डोजाङबाट आफ्नो खेल यात्रा सुरु गरेका थिए । त्यसयता उनले राष्ट्रिय तथा अन्तर्राष्ट्रिय स्तरमा अनेकौं पदकहरू जित्दै तेक्वान्दो क्षेत्रमा आफ्नो परिचय सुदृढ पारेका छन् । राष्ट्रिय टिमका संयोजक र नेपाल तेक्वान्दो संघका केन्द्रीय सदस्यको भूमिका समेत निर्वाह गरिसकेका गिरी अहिले खेल प्रशासन र खेलाडी विकास दुवै क्षेत्रमा सक्रिय छन् ।

लामो समयदेखि प्रशिक्षकका रूपमा योगदान दिंदै आएका गिरीले आफ्नै डोजाङमार्फत पाँच सयभन्दा बढी ब्ल्याक बेल्ट खेलाडी उत्पादन गरिसकेका छन् । उनका धेरै शिष्यहरू दोस्रोदेखि पाँचौँ डानसम्मका खेलाडी बनेका छन् र अहिले देश–विदेशमा तेक्वान्दोका प्रशिक्षक तथा प्रतिस्पर्धीका रूपमा सक्रिय छन् ।

गिरीले उपाध्यक्षमा मनोनयन भएपछि भने, “तेक्वान्दो मेरो जीवनको अभिन्न हिस्सा हो। अब संघको जिम्मेवारीमा रहेर खेलमार्फत समाज र राष्ट्र निर्माणमा योगदान पुर्‍याउने लक्ष्य लिएको छु ।” उनले संघको भिजनअनुसार खेलको पहुँच विस्तार, अनुशासन, र खेलाडीको व्यावसायिक विकासमा ध्यान दिने प्रतिबद्धता व्यक्त गरे ।

तेक्वान्दोको क्षेत्रमा अनुशासन, समर्पण र नेतृत्वको प्रतिक मानिने गिरीको उपाध्यक्ष पदमा आगमनले संघमा नयाँ उत्साह थपिएको खेलकुद क्षेत्रमा टिप्पणी गरिन्छ। खेलाडी उत्पादनदेखि संस्थागत सुदृढीकरणसम्म उनको योगदानले तेक्वान्दो समुदायमा नयाँ सम्भावनाको बाटो खोलेको विश्वास गरिएको छ ।