थानकोटमा भिनाजुको चक्कु प्रहारबाट सालोको मृत्यु

काठमाडौँ । काठमाडौँको चन्द्रागिरि नगरपालिका–३ थानकोटमा एक दुःखद पारिवारिक घटना सार्वजनिक भएको छ । महोत्तरी घर भई हाल थानकोट बस्दै आएका भिनाजु समी अहमद र सालो जाकिर मन्सुरीबीचको सामान्य घरायसी झगडाले उग्र रूप लिँदा मन्सुरीले ज्यान गुमाउनुपरेको छ ।

गएराति दुई जनाबीच घरायसी विषयलाई लिएर भनाभन भएको थियो । विवाद बढ्दै गएपछि आक्रोशित बनेका भिनाजु समी अहमदले आफ्नै सालो जाकिर मन्सुरीमाथि चक्कु प्रहार गरेका थिए । चक्कु प्रहारबाट गम्भीर घाइते भएका मन्सुरीको मृत्यु भएको प्रहरीले जनाएको छ ।

जिल्ला प्रहरी परिसरका प्रहरी उपरीक्षक पवनकुमार भट्टराईका अनुसार घटनामा संलग्न अभियुक्त भिनाजु अहमदलाई प्रहरीले तत्कालै नियन्त्रणमा लिएको छ । घटनाबारे थप अनुसन्धान अघि बढाइएको छ भने मृतक मन्सुरीको शव परीक्षण पोस्टमार्टमका लागि महाराजगञ्जस्थित त्रिभुवन विश्वविद्यालय, शिक्षण अस्पताल टीयू टिचिङ हस्पिटल पठाइएको छ ।