काठमाण्डौँ । जारी टी-२० विश्वकपअन्तर्गत सुपर ८ को महत्त्वपूर्ण खेलमा श्रीलंकालाई ६१ रनले हराउँदै न्युजिल्यान्डले सेमिफाइनल पुग्ने सम्भावना बलियो बनाएको छ । योसँगै पाकिस्तान अर्को चरणमा पुग्ने सम्भावना भने अझ कमजोर बनेको छ। बुधबार भएको खेलमा जितले न्युजिल्यान्ड सेमिफाइनल पुग्ने सम्भावना बढेको छ भने श्रीलंका भने प्रतियोगिताबाट बाहिरियो ।

समूह दुईमा रहेका पाकिस्तान, श्रीलंका, न्युजिल्यान्ड र इङ्‌ग्यल्यान्डले अहिलेसम्म दुई-दुई खेल खेलेका छन् । इङ्ंग्ल्यान्डले दुवै खेल जितेर चार अंकसहित सेमिफाइनलमा स्थान बनाइसकेको छ भने न्युजिल्यान्डले दुई खेलपछि तीन अंक बनाएको छ। पाकिस्तानले पनि दुई खेल खेलेको छ, एउटा खेल इङ्‌ग्ल्यान्डसँग हार्‍यो भने न्युजिल्यान्डविरुद्धको खेल वर्षाका कारण रद्द भयो।

पाकिस्तानसँग हाल एक अंक मात्र छ। अब शुक्रबार इङ्‌ग्यल्यान्डले न्युजिल्यान्डलाई ठुलो अन्तरले हराएमा र शनिबार पाकिस्तानले श्रीलंकालाई जितेमा मात्र पाकिस्तान सेमिफाइनलमा पुग्न सक्छ। यद्यपि यस अवस्थामा पनि समूह २ बाट सेमिफाइनलमा पुग्ने दोस्रो टोली रनरेटका आधारमा निर्णय गरिनेछ ।