चितवन । प्रधानमन्त्री बालेन्द्र शाहले अख्तियार दुरुपयोग अनुसन्धान आयोगका पदाधिकारीहरूलाई आवश्यक परेमा पाँचै वर्षसम्म पनि सोधपुछ र सरसल्लाह लिने बताएका छन्। आइतबार राष्ट्रिय स्वतन्त्र पार्टी रास्वपाको प्रथम महाधिवेशनमा बोल्दै उनले पछिल्लो समय अख्तियारसँगको सहकार्य र सोधपुछका विषयमा स्पष्ट पार्दै यस्तो बताएका हुन् ।

उनले भने, त्यो निहुँ खोज्दै गर्दा अख्तियारलाई ५ घण्टा सोधपुछ गर्नुपर्छ वा सरसल्लाह लिनुपर्छ भने ५ घण्टा मात्रै होइन, हामी ५ वर्ष गर्छौँ। ५ वर्ष नै अख्तियारलाई राखेर सरसल्लाह गरिन्छ, यसमा कसैले चिन्ता लिनुपर्दैन । प्रधानमन्त्री शाहले विगतमा भएका फट्याइँ र सरकारी सम्पत्ति तथा रकमको दोहनका घटनामा आफ्नो सरकारले निहुँ खोज्ने स्पष्ट पारे । उनले सामाजिक सञ्जाल वा मिडियामा सरकारको कार्यशैली अलि अनियन्त्रित देखिएको जस्तो लागे पनि सबै कुरा नियन्त्रणमै रहेको दाबी गरे ।