काठमाडौँ । नेपाल आयल निगमका कार्यकारी निर्देशक चण्डिका प्रसाद भट्टले बजारमा खाना पकाउने ग्यासको अभाव नभएको स्पष्ट पारेका छन् । पछिल्लो समय ग्यास अभाव हुन लागेको भन्दै चलेको हल्ला निराधार रहेको बताउँदै उनले उपभोक्तालाई नआत्तिन आग्रह गरेका हुन् । बुधबार सामाजिक सञ्जालमार्फत जानकारी दिँदै भट्टले ग्यासको आपूर्ति प्रणाली सहज र पर्याप्त रहेको बताए ।

उनले दैनिक उपभोगको माग धान्न सक्ने गरी नियमित रूपमा ग्यास आयात भइरहेको दाबी गरेका छन् । भट्टका अनुसार नेपालमा हाल दैनिक सरदर ९० बुलेट ग्यास करिब १ लाख १४ हजार सिलिन्डरको माग छ। तर, पछिल्ला दिनहरूमा मागभन्दा बढी परिमाणमा इन्डियन आयल कर्पोरेसन आईओसी बाट ग्यास लोड भइरहेको छ ।

उनले शनिबार ११८ बुलेट करिब १ लाख ४९ हजार ५ सय सिलिन्डर, सोमबार ११५ बुलेट र मंगलबार १३२ बुलेट ग्यास लोड भएको उल्लेख गरे । तीमध्ये केही बुलेट नेपाल भित्रिसकेको र केही बाटोमा रहेका छन् । आपूर्ति सहज रहेकाले अनावश्यक रूपमा ग्यास सञ्चय नगर्न उनले उपभोक्तालाई आग्रह गरेका छन् । साथै, आसन्न निर्वाचनको अवधिमा पनि हालकै परिमाणमा ग्यास आपूर्ति निरन्तर रहने निगमले स्पष्ट पारेको छ ।