बाढी प्रभावितलाई ग्यास उद्योग संघले एक हजार २५० सिलिन्डर निःशुल्क दिने

काठमाडौँ । नेपाल एलपी ग्यास उद्योग संघले रसुवाको भोटेकोशी नदीमा आएको विनाशकारी बाढीबाट प्रभावित नागरिकलाई राहतस्वरूप १ हजार २ सय ५० भरिएका ग्यास सिलिन्डर उपलब्ध गराउने भएको छ । संघले बाढीबाट अत्यन्त प्रभावित रसुवा, नुवाकोट, धादिङ र गोरखालगायत जिल्लाका नागरिकलाई मानवीय सहायताका रूपमा ग्यास उपलब्ध गराउने घोषणा गरेको हो ।

गत भदौ १० गते बुधबार बिहान आएको बाढीले ठूलो जनधनको क्षति पुर्‍याएकोप्रति गहिरो दुःख व्यक्त गर्दै संघले राहतस्वरूप उपलब्ध गराइने ग्यास सिलिन्डर नेपाल आयल निगममार्फत लक्षित प्रभावित वर्गसम्म पुर्‍याउने जनाएको छ । संघका अध्यक्ष दीवानबहादुर चन्दद्वारा जारी विज्ञप्तिमा विपद्को समयमा प्रभावित नागरिकलाई सहयोग गर्नु सबैको साझा जिम्मेवारी भएको उल्लेख गर्दै तत्कालको आवश्यकता र कठिनाइलाई मध्यनजर गरी राहत घोषणा गरिएको जनाइएको छ ।

संघले बाढीमा ज्यान गुमाउनेहरूप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेको छ । साथै, घाइतेहरूको शीघ्र उपचार तथा बेपत्ता भएकाहरूको खोजी कार्यलाई तीव्र बनाउन राज्यका सबै संयन्त्र परिचालन गर्न पनि संघले अपील गरेको छ । विपद् कुनै एक व्यक्ति वा समुदायको मात्र समस्या नभएको भन्दै संघले प्रभावित नागरिकको उद्धार, राहत र पुनःस्थापनाका लागि सबै पक्षलाई मानवीय भावनाका साथ हातेमालो गर्न आग्रह गरेको छ ।