काठमाडौँ । पुराना राजनैतिक दलमा पुस्तान्तरण र नेतृत्व हस्तान्तरणको बहस चलिरहेका बेला व्यवहारमा भने पुरानै पार्टी प्रमुखले रजगज गरिरहेका छन्। केही दलहरुमा पुराना पार्टी प्रमुखहरु फेरि पार्टी प्रमुखमा स्थापित भइसकेका छन् भने केहीमा नयाँ र आशालाग्दा अनुहारहरु बुढाहरुकै जिम्मामा पार्टी छाडेर आफूहरु मैदान छोडेर भाग्न थालेका छन् ।

जेनजी विद्रहका बेला सत्तामा रहेका तत्कालीन प्रधानमन्त्री केपी शर्मा ओली महाधिवेशनबाटै पार्टी प्रमुखमा स्थापित भइसकेका छन्। एमालेभित्र नेतृत्व हस्तान्तरणको बहस चलेको भए पनि पुस्तान्तरणको बहस गर्नेहरु अल्पमतमा परेका छन् । ओलीलाई अध्यक्ष छाड्न सुझाव दिनेमध्ये केही अन्तिम समयमा ओलीकै पाउमा परे भने उनीसँग चुनाब लड्न तम्सिएका केही पराजित भए ।

पुष्पकमल दाहाल नेतृत्वको तत्कालीन नेकपा माओवादी केन्द्र र माधव नेपाल नेतृत्वको तत्कालीन नेकपा एकीकृत समाजवादीमा पनि नेतृत्व हस्तान्तरणको बहस चलेको थियो। यी नेताहरुले नेतृत्व हस्तान्तरणको बहसलाई साम्य पार्न महाधिवेशनमा गएर फेरि आफू चुनिने विकल्प रोजेनन्। उनीहरुले पार्टी एकता गर्दै कानुनले महाधिवेशन टार्न दिएको लुपहोल प्रयोग गरेर नेतृत्वमा आफैं स्थापित भए 

देशको सबैभन्दा ठूलो दल नेपाली कांग्रेसमा भने पुस्तान्तरणको बहसलाई अगाडि बढाइरहेका युवा नेताहरु नै मैदान छोडेर भाग्न थालेका छन्। कांग्रेसका महामन्त्री विश्वप्रकाश शर्माले आफू फागुन २१ को चुनाब नै नलड्ने घोषणा गरेका छन्। अर्का महामन्त्री गगन थापाले भने महाधिवेशन भए मात्र चुनाब लड्ने अन्यथा नलड्ने घोषणा गरेका छन्।

दुई महामन्त्रीको साथमा सहमहामन्त्री बद्री पाण्डेले पनि फागुन २१ लाई तोकिएको चुनाब नलड्ने घोषणा गरेका छन्। उनले नयाँ पुस्तालाई अवसर दिन आफू चुनाब नलड्ने बरु पार्टीको सुदृढीकरणमा लाग्ने बताएका छन्। उनले गृहजिल्ला बाजुराको बैठकमै आफू चुनब लड्न इच्छुक नभएको बताएपछि जिल्लाले पनि उनको नाम उम्मेदवारको रुपमा सिफारिस गरेको छैन।