रसुवाको चिलिमे टनेलमा फसेकाहरूको खोजी जारी : लेदो र भग्नावशेष हटाउन रातभर खटियो उद्धार टोली

रसुवा । रसुवास्थित चिलिमे टनेल क्षेत्रमा फसेका मजदुर तथा प्राविधिकहरूको खोजी र उद्धारका लागि रातभर काम जारी राखिएको छ। उद्धार टोलीले रातभरी नै सुरुङ नजिक जम्मा भएको लेदो, माटो तथा ठूला भग्नावशेषहरू हटाउने कार्यलाई निरन्तरता दिएको हो ।

एक्साभेटर लगायतका भारी उपकरणहरूको प्रयोग गरी टनेल प्रवेश गर्ने मुख्य बाटो खुलाउने प्रयास निरन्तर भइरहेको छ । प्रतिकूल मौसम र ठूलो मात्रामा थुप्रिएको लेदोका बीच पनि सुरक्षा निकाय र उद्धार टोलीले रातदिन नभनी काम गरिरहेका छन् । रातिको समयमा समेत उद्धारकर्ताहरू टनेलभित्र प्रवेश गर्ने सम्भावित बाटो बनाउन निरन्तर जुटिरहेका थिए ।