काठमाडौँ । अमेरिकाले संयुक्त राष्ट्रसंघको महासभामा सहभागी भएर पनि देश छाड्ने आदेश बेवास्ता गरेका दुई इरानी कूटनीतिज्ञलाई अमेरिकाबाट निष्कासन गरेको छ । अमेरिकी विदेश मन्त्रालयका अनुसार, ती दुवै इरानी प्रतिनिधिमण्डलका सदस्य महासभा सकिएको लामो समयपछि पनि न्युयोर्कमै रहेको पाइएको थियो । विदेशमन्त्री मार्को रुबियोको निर्देशनपछि उनीहरूलाई अमेरिकाबाट निकालिएको मन्त्रालयले जनाएको छ ।

अमेरिकी सञ्चारमाध्यमका अनुसार विदेश मन्त्रालयले इरानी विदेशमन्त्री अब्बास अराघ्ची र उनको टोलीलाई सेप्टेम्बर २८ सम्म अमेरिका छाड्न भनेको थियो । तर अक्टोबर २ मा संयुक्त राष्ट्रसंघस्थित इरानी मिसनबाट उनीहरू अझै अमेरिकामै रहेको जानकारी पाएपछि दुई सदस्यलाई निष्कासन गरिएको हो ।

समाचार संस्था एक्सियोसका अनुसार एक सदस्य अक्टोबर २ को राति र अर्का सदस्य अक्टोबर ३ को बिहान अमेरिका छाडेका थिए ।