काठमाण्डौँ । काठमाडौँबाट मोटरसाइकल चोरीमा संलग्न ३ जनालाई शुक्रबार दिउँसो ट्राफिक प्रहरीले नियन्त्रणमा लिएको छ ।  नियन्त्रणमा आउनेमा सिन्धुलीको सुनकोशी गाउँपालिका ४ घर भई हाल ललितपुरको ग्वार्को बस्ने २५ वर्षीय सुजन पुरकुटी, सोही स्थानका २३ वर्षीय आशिष गुरुङ र बनस्थली बस्ने मकवानपुरको बाग्मती गाउँपालिका १ का २२ वर्षीय सन्देश बल रहेका छन् ।  

बा ८७ प ९२० नम्बरको मोटरसाइकल काठमाडौँको नागार्जुन नगरपालिका १ श्रीनगरबाट गत साउन १८ गते हराएको भनि गोरखाको भिमसेनथापा गाउँपालिका ५ का विनक श्रेष्ठले खोजतलासका लागि काठमाडौँ उपत्यका ट्राफिक प्रहरी कार्यालयमा निवेदन दिएका थिए । 

उक्त नम्बरको मोटरसाइकलको नम्बर परिवर्तन गरी बा ८० प १४ ३७ नम्बर राखी गुहेश्वरी स्थित ड्रिम बाइक रिकण्डिसन भित्र लुकाई राखेको अवस्थामा काठमाडौँ उपत्यका ट्राफिक प्रहरी कार्यालयबाट खटिएको टोलिले शुक्रबार दिउँसो पुरकुटी र गुरुङलाई नियन्त्रणमा लिएको हो । उक्त मोटरसाइकल नगद १७ हजारमा सन्देश बलसँग किनेको भनी उनीहरुले दिएको वयानका आधारमा शुक्रबार नै काठमाडौँको रानीबारीबाट बललाई पनि प्रहरीले पक्राउ गरेको हो ।

मोटरसाइकल सहित नियन्त्रणमा लिइएका तीनै जनालाई आवश्यक अनुसन्धानका लागि प्रहरी वृत्त स्वयम्भु पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीले जानकारी दिनुभयो  । 

आफ्नो सवारी साधन सुरक्षित स्थानमा पार्किङ गर्ने, ह्विल लक, चेन लक, ह्यान्डिल लक, डिस्क लक, लगायत सुरक्षा साइरनहरू जडान गर्नुका साथै मानिसहरूको आवत जावत नहुने एकान्त स्थानमा पार्किङ नगर्न सम्पूर्णमा अनुरोध छ । हराएका सवारी साधन खोजतलास र चोरी नियन्त्रण कार्य निरन्तर हुँदै आए तापनि सवारी धनी स्वयम् सजग भई सुरक्षित स्थानमा पार्किङ गर्न अनुरोध गरिन्छ । सवारी साधन हराएमा ट्राफिक प्रहरीको हटलाईन नम्बर १०३, नेपाल प्रहरीको हटलाइन नम्बर १०० मा तत्कालै आफ्नो सवारी साधनको विवरण सहित फोन गर्न र नजिकैको प्रहरी कार्यालयमा निवेदन दिन सकिने छ ।