पाल्पा । पाल्पाको रिद्धिकोट गाउँपालिका–२ स्थित जोर्ते उकालोमा आज बिहान भएको टिप्पर दुर्घटनामा एक जनाको मृत्यु भएको छ। नवलपरासीस्थित पाल्पा सिमेन्ट उद्योगबाट गुल्मीतर्फ जाँदै गरेको ना ८ ख ३६५ नम्बरको टिप्पर सडकबाट करिब २५० मिटर तल खसेर दुर्घटनाग्रस्त भएको प्रहरीले जनाएको छ।

जिल्ला प्रहरी कार्यालय पाल्पाका प्रहरी नायब उपरीक्षक होमप्रसाद चौधरीका अनुसार दुर्घटना आज बिहान करिब ४ः३० बजे भएको हो। दुर्घटनामा टिप्पर चालक केशव परियारको घटनास्थलमै मृत्यु भएको पुष्टि भएको छ। प्रहरीका अनुसार मृतक चालकबाहेक अन्य व्यक्तिको संलग्नता वा थप विवरण हालसम्म खुल्न सकेको छैन। दुर्घटनाको सूचना प्राप्त हुनासाथ हाडथोक र अर्गली प्रहरी चौकीबाट खटिएको टोली घटनास्थलमा पुगेर उद्धार कार्य तथा प्रारम्भिक अनुसन्धान सुरु गरेको छ।

दुर्घटनाको कारण खुल्न बाँकी रहेको र यस सम्बन्धमा थप अनुसन्धान जारी रहेको प्रहरीले जनाएको छ।