ट्रम्पको सुरक्षा बैठक निष्कर्षविहीन : अमेरिका-इरान शान्ति सम्झौता अन्योलमा

काठमाण्डौँ । अमेरिकी राष्ट्रपति डोनाल्ड ट्रम्पले इरानसँगको सम्भावित शान्ति सम्झौता र ६० दिने युद्धविराम थप गर्ने विषयमा ‘अन्तिम निर्णय’ लिन ह्वाइट हाउसको सिचुएसन रुममा बोलाएको उच्चस्तरीय सुरक्षा बैठक बिना कुनै निष्कर्ष टुङ्गिएको छ । राष्ट्रिय सुरक्षा टोलीसँग करिब दुई घण्टासम्म चलेको महत्त्वपूर्ण बैठक सकिए पनि ह्वाइट हाउसले सम्झौता स्वीकृत भएको वा नभएको बारे कुनै आधिकारिक घोषणा नगरेको अन्तर्राष्ट्रिय सञ्चार माध्यमहरूले जनाएका छन् ।

यसअघि बिहीबार मात्रै दुवै देशले ६० दिनको युद्धविराम विस्तार गर्ने र इरानको आणविक कार्यक्रमको भविष्यबारे औपचारिक वार्ता शुरू गर्ने गरी एउटा समझदारी पत्र एमओयूको मस्यौदा तयार पारेको खबर बाहिरिएको थियो । तर, दुवै देशका शीर्ष नेतृत्वको अन्तिम स्वीकृति नभएसम्म यो केवल एउटा खाका मात्र रहने अमेरिकी अधिकारीहरूले स्वीकार गरेका छन् ।