इरानलाई ट्रम्पको चेतावनी : मलाई नसोधी नयाँ सर्वोच्च नेता चयन नगर्नू

काठमाण्डौँ । अमेरिकाका राष्ट्रपति डोनाल्ड ट्रम्पले आफ्नो संलग्नताबिना नयाँ सर्वोच्च नेता चयन नगर्न इरानलाई चेतावनी दिएका छन् । इरानको नयाँ नेता चयनमा अमेरिकाको भूमिका आवश्यक रहेको जिकिर गर्दै आफूहरूलाई नसोधी छनोट गरिए समयको बर्बादी मात्र हुने धम्की दिएका छन् । एक्सियोससँगको अन्तर्वार्तामा ट्रम्पले भनेका छन्, ‘यदि इरानले अमेरिकाको संलग्नताबिना नयाँ सर्वोच्च नेता चयन गर्छ भने त्यो अर्थहीन हुनेछ ।’

यस क्रममा उनले मारिएका सर्वोच्च नेता अली खामेनीका छोरा मोज्तबा खामेनीलाई सम्भावित उत्तराधिकारीको रूपमा हेरिएको कुरा स्वीकार नभएको पनि बताएका छन् । उनले भनेका छन्, ‘यदि नयाँ नेताले पुरानो नेतृत्वको नीतिलाई निरन्तरता दिए भने आगामी वर्षमा अमेरिका र इरानबिच अर्को द्वन्द्व हुन सक्छ ।’ ट्रम्पले अमेरिकाले इरानमा शान्ति र स्थिरता ल्याउन सक्ने नेता चाहेको उल्लेख गरेका छन् । इजरायल र अमेरिकाले गत फेब्रुअरी २८ का दिन संयुक्त सैन्य हमला गरी इरानका सर्वोच्च नेता आयातोल्लाह अली खामेनीलाई मारेपछि यो पद खाली छ।