मल किन्न भारत गएर जेल परेका दुई नेपाली किसान ३८ दिनपछि धरौटीमा रिहा

काठमाडौँ । खेतका लागि रासायनिक मल किन्न भारत गएका बेला पक्राउ परेका सर्लाहीका दुई नेपाली किसान ३८ दिनपछि थुनामुक्त भएका छन् । सर्लाहीको बलरा नगरपालिका–५ का सुरेशप्रसाद सिंह र नागेन्द्रप्रसाद सिंह भारतीय अदालतको आदेशअनुसार शुक्रबार धरौटीमा रिहा भएका हुन् । भारतको सीतामढी जिल्लास्थित डुम्रा व्यवहार अदालतका सह–विशेष न्यायाधीश अखलेशकुमार झाको एकल इजलासले बुधबार नै उनीहरूलाई धरौटीमा छाड्न आदेश दिएको थियो ।

सुरेशप्रसादका छोरा अविनाश सिंहका अनुसार दुवै जना शुक्रबार साँझ पौने आठ बजेतिर डुमरवा जेलबाट छुटेका हुन् । ‘आमा र भाइ, बुबा र ठूलो बुबालाई लिन डुमरवा जानुभएको छ,’ अविनाशले भने, ‘उहाँहरू रिहा हुनुभएको खबर प्राप्त भएको छ ।’ अदालतमा किसानका तर्फबाट कानुनव्यवसायी संजयकुमार झा र किरण चौधरीले बहस गरेका थिए ।