मोरङ । धान उत्पादनको हिसाबले देशमै राम्रो मानिने मोरङ जिल्लामा यस वर्ष बेमौसमी वर्षाका कारण धान उत्पादन घटेको छ। गत वर्षको तुलनामा यस वर्ष दुई हजार ८४ मेट्रिक टन धान उत्पादन घटेको हो । मोरङस्थित कृषि ज्ञान केन्द्रकी प्रमुख दीपा देवका अनुसार कात्तिक दोस्रो साताको बेमौसमी वर्षाले धानखेतीमा क्षति पुग्दा उत्पादन घटेको आकलन गरिएको छ। उहाँका अनुसार गत वर्ष जिल्लामा तीन लाख ३९ हजार तीन दशमलव ४५ मेट्रिक टन धान उत्पादन भएकामा यस वर्ष तीन लाख ३६ हजार ९१९ दशमलव ४१ मेट्रिक टन उत्पादन भएको छ। गत वर्ष प्रतिहेक्टर चार दशमलव ८८ मेट्रिक टन धान उत्पादन भएकामा यस वर्ष प्रतिहेक्टर चार दशमलव ८५ मेट्रिक टनमात्र उत्पादन भएको हो। यस वर्ष जिल्लामा ६९ हजार ४६७ दशमलव ९२ हेक्टर क्षेत्रफलमा धानखेती गरिएको थियो ।

कृषिविज्ञ राजेन्द्र उप्रेतीले खेतीयोग्य जमिन आसपासका खोलानाला मास्ने क्रम बढ्दो भएकाले पानीको निकास हुन नसक्दा पाकेको धानमा बढी क्षति पुगेर उत्पादन घटेको हुनसक्ने अनुमान व्यक्त गरेका छन्। उहाँले यस वर्ष धान राम्रो उत्पादन भए पनि थन्क्याउने समयमा बेमौसमी वर्षाले असर पुगेको बताए।

बेलबारी–११ भाङबारीका किसान वीरेन्द्र खत्रीले करिब छ बिघा जमिनमा लगाएको धानखेतीमा करिब ९० मन धानमा बेमौसमी वर्षाले क्षति पुगेको बताएका छन्। धानमा क्षतिसँगै मूल्यमा पनि गिरावट आएकाले किसानहरू चिन्तित हुनुपरेको खत्रीको भनाइ छ।

खत्रीका अनुसार यस वर्ष धानको बजार मूल्य प्रतिमन रु १२ सय देखि रु १,३ सय सम्म रहेको छ। गत वर्ष मङ्सिरमा धानको बजार मूल्य प्रतिमन रु १७ सय देखि रु १८ सय सम्ममा कारोबार भएको थियो।