काठमाडौँ । नेकपा एकीकृत समाजवादीका नेता किसान श्रेष्ठले आफूहरू निःसर्त एमालेमा फर्किन लागेको बताएका छन् । श्रेष्ठ सम्मिलित रामकुमारी झाँक्रीको समूहले आज बबरमहलस्थित होटल बसेरामा आयोजना गरेको पत्रकार सम्मेलनमा श्रेष्ठले सबै कुरा बिर्सेर एमालेमा फर्कन चाहेको बताएका हुन् ।
श्रेष्ठले भने, ‘जानेर, नजानेर चार वरषअघि एमालेबाट विद्रोह गर्‍यौँ, सबै कुरा बिर्सेर बिनासर्त आफ्नो घरमा फर्किन चाहन्छौँ।’

उनले एकीकृत समाजवादीका नेता कार्यकर्तालाई एमालेमा फर्कन आह्वान पनि गरे । ‘देशकाभरका नेता–कार्यकर्ता साथीहरूलई पनि हामी आह्वान गर्छौँ’, उनले भने, ‘यो पनि भ्रम नहोस् कि हामी कुनै पदका लागि एमालेमा फर्कन लागेका होइनौँ। हामी निःसर्त घर फर्किन लागेका हौँ। हामीलाई सम्मानपूर्वक हाँसेर बालिदिए पुग्छ।’ अध्यक्ष माधवकुमार नेपाल नेतृत्वमा एकीकृत समाजवादी आज माओवादी केन्द्रलगायत दलसँग एकता गरिरहँदा झाँक्री–श्रेष्ठ समूह एमालेमा फर्कन लागेको हो ।