दाङमा युवा किसानको स्ट्रबेरी खेती फस्टाउँदै, लाखौँको कारोबार

काठमाडौँ । कृषि प्रविधि र व्यावसायिक सोचका कारण दाङको घोराही क्षेत्रमा स्ट्रबेरी खेती फस्टाउन थालेको छ । कैलालीका २७ वर्षीय दशरथ साउदले घोराही–१५ मा दुई बिघा जग्गामा गरेको स्ट्रबेरी खेतीबाट लाखौँको कारोबार गर्दै आएका छन् ।

गत वर्ष २१ लाख रुपैयाँ बराबरको बिक्री गरेका साउदले यस वर्ष मङ्सिरदेखि नै स्ट्रबेरी बिक्री सुरु गरिसकेका छन्। हाल दैनिक ७० किलोभन्दा बढी स्ट्रबेरी प्रतिकिलो ७ सय रुपैयाँमा बिक्री भइरहेको छ। घोराही–१४ का अर्का युवा वीरेन्द्र खड्काले पनि थोपा सिँचाइ र मल्चिङ प्रविधि प्रयोग गरी व्यावसायिक स्ट्रबेरी खेतीबाट राम्रो आम्दानी गरिरहेका छन् ।

कृषि ज्ञान केन्द्र दाङका अनुसार जिल्लाको हावापानी स्ट्रबेरी खेतीका लागि उपयुक्त रहेकाले युवाको सक्रियतासँगै यसको भविष्य आशाजनक देखिएको छ।