विभिन्न घटनामा मानव बेचबिखनका ४ जनालाई पक्राउ, पीडितको उद्धार

काठमाडौँ । विभिन्न मितिमा भएका मानव बेचबिखन तथा ओसारपसारसम्बन्धी घटनामा संलग्न चार जना प्रतिवादीलाई प्रहरीले पक्राउ गरेको छ । उनीहरूविरुद्ध अलग–अलग घटनामा अनुसन्धान अघि बढाइएको छ भने पीडितहरूको उद्धारसमेत गरिएको प्रहरीले जनाएको छ ।

मकवानपुरको बकैया गाउँपालिका–१२ की ३० वर्षीया वास्ना माया योञ्जनलाई जबरजस्ती यौन शोषणमा संलग्न गराएको आरोपमा पक्राउ गरिएको हो। उनले काम लगाइदिने बहानामा पीडितलाई ललितपुरस्थित खाजाघरमा लगेर विभिन्न ग्राहकसँग यौन क्रियाकलाप गर्न बाध्य बनाएको प्रारम्भिक अनुसन्धानबाट खुलेको छ। पछि अर्को स्थानमा समेत कामको प्रलोभन देखाउँदै डर–धम्की र आर्थिक लोभ देखाई वेश्यावृत्तिमा लगाइएको अवस्थामा प्रहरीले पीडितको उद्धार गरेको थियो।

त्यस्तै, काठमाडौँ चन्द्रागिरी–१४ का २३ वर्षीय आयुष केसीले वैदेशिक रोजगारीको प्रलोभनमा पारी एक युवतीलाई कम्बोडिया पुर्‍याएर अनलाइन स्क्याममा जबरजस्ती लगाएको आरोप छ। मासिक एक लाख रुपैयाँ तलब हुने काम दिलाइदिने भन्दै तीन लाख रुपैयाँ उठाएर उनलाई भारत हुँदै कम्बोडिया लगिएको थियो। त्यहाँ पुगेपछि पासपोर्ट र मोबाइल नियन्त्रणमा लिई बन्धक बनाउँदै गैरकानुनी काममा लगाइएको थियो। पछि पीडित भागेर नेपाल फर्किन सफल भएकी थिइन्।

यसैगरी, दोलखाकी ५६ वर्षीया सुष्मा तामाङ र धादिङका ४२ वर्षीय हरी शम्शेर रायमाझीले काठमाडौँको कलंकी क्षेत्रमा कोठा भाडामा लिएर ८ जना महिला तथा नाबालिकालाई वेश्यावृत्तिमा लगाएको आरोपमा पक्राउ परेका छन्। उनीहरूले विभिन्न प्रलोभन र डर–त्रास देखाई दैनिक रूपमा ग्राहकसँग शारीरिक सम्पर्क गर्न बाध्य बनाउने गरेको पाइएको छ। प्रहरी टोलीले छापा मारेर सबै पीडितको उद्धार गरेको जनाएको छ। पक्राउ परेका सबै प्रतिवादीविरुद्ध सम्बन्धित जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ।