काठमाडौँ । नेपाल क्रिकेट संघ क्यानले सन् २०२६ का लागि क्रिकेट गतिविधिहरूले भरिएको विस्तृत वार्षिक क्यालेन्डर सार्वजनिक गरेको छ । हालै आयोजित पत्रकार भेटघाट कार्यक्रममा क्यानले पुरुष, महिला तथा युवा तहका राष्ट्रिय, क्षेत्रीय र अन्तर्राष्ट्रिय प्रतियोगिताहरू समेटिएको कार्यतालिका सार्वजनिक गरेको हो ।

यस वर्ष क्यानले घरेलु संरचनालाई बलियो बनाउँदै अन्तर्राष्ट्रिय स्तरमा नेपाली टोलीको प्रतिस्पर्धात्मक क्षमता बढाउने मुख्य लक्ष्य राखेको छ । घरेलु प्रतियोगिता अन्तर्गत मार्च र अप्रिल महिनामा पुरुष राष्ट्रिय ए डिभिजन कप र राष्ट्रिय विद्यालय च्याम्पियनसिप आयोजना हुनेछन् । यी प्रतियोगिताहरू जिल्ला र प्रदेशस्तरबाटै सुरु गरिने क्यानले जनाएको छ । त्यस्तै, जय ट्रफी, वाईवाई पुरुष राष्ट्रिय क्रिकेट, महिला ए डिभिजन कप र पहिलो पटक महिला लङ फर्म्याट लामो दूरीको प्रतियोगिता पनि वर्षभर सञ्चालन हुनेछन् । 

युवा क्रिकेटलाई प्राथमिकतामा राख्दै क्यानले क्यान युवा कपसँगै लेभल १ र २ को कोचिङ, पिच क्युरेटर र अम्पायरिङ कोर्सहरू समेत सञ्चालन गर्ने योजना बनाएको छ । बहुप्रतिक्षित नेपाल प्रिमियर लिग एनपीएललाई पनि २०२६ को क्यालेन्डरमा निरन्तरता दिइएको छ ।