देउवा समूह समानान्तर महाधिवेशनमा, सभापतिकै हैसियतमा देउवाको अपिल

काठमाडौँ । नेपाली कांग्रेसको निवर्तमान सभापति शेरबहादुर देउवा समूह समानान्तर महाधिवेशनमा होमिएको छ । देउवा समूहले १५ औँ महाधिवेशनका नाममा आज असोज १५ गते वडा अधिवेशन गर्दै छ । निवर्तमान सभापति देउवाले सभापितकै हैसियतमा पार्टीको १५औँ महाधिवेशनअन्तर्गत आजदेखि देशभर सुरु हुने वडा अधिवेशनमा सहभागी हुन नेता–कार्यकर्तालाई अपिल गरेका छन् ।

देउवाले बिहीबार जारी गरेको अपिलमा पार्टीको आफ्नो समूहले आयोजना गर्ने महाधिवेशन प्रक्रियालाई समर्थन गर्दै देशभरका ६ हजार ७ सय ४३ वडामा एकैसाथ विधि र प्रक्रिया पूरा गरेर अधिवेशन सुरु हुन लागेको उल्लेख गरेका छन् ।

देउवाको यो अपिल कांग्रेसभित्र संस्थापन र इतर समूहबीच महाधिवेशनको प्रक्रिया तथा नेतृत्वलाई लिएर विवाद चर्किरहेका बेला आएको हो। पार्टीको संस्थापनपक्षले यही असोज १८ गते सुरु हुने १५ औँ महाधिवेशनका लागि वडा र क्षेत्रीय अधिवेशनहरू सम्पन्न गरिसकेको छ । तर देउवा समूह विशेष महाधिवेशनबाट गगन थापाको नेतृत्वमा निर्वाचित भएको केन्द्रीय कार्यसमितिलाई अस्वीकार गरी समानान्तर महाधिवेशन गर्न लागेको हो ।