रास्वपाद्वारा संघीय निर्वाचन समिति गठन, संयोजकमा डिपी अर्याल

काठमाडौँ । राष्ट्रिय स्वतन्त्र पार्टी रास्वपाले संघीय निर्वाचनलाई लक्षित गर्दै संघीय निर्वाचन सम्पादन समिति गठन गरेको छ । फागुन २१ मा हुने प्रतिनिधिसभा सदस्य निर्वाचनका लागि आवश्यक गतिविधि सञ्चालन गर्न समिति बनाइएको हो । केन्द्रीय समितिको निर्णयअनुसार उपसभापति डोलप्रसाद डिपी अर्यालको संयोजकत्वमा ५१ सदस्यीय संघीय निर्वाचन सम्पादन समिति गठन गरिएको रास्वपाले जनाएको छ। समितिको सदस्य सचिवमा शंकर श्रेष्ठ छन् ।

प्रदेश समन्वय सचिवका रूपमा कोसी प्रदेशमा उपेन्द्र पाण्डे, मधेस प्रदेशमा डा। नमिता यादव, बागमती प्रदेशमा सरिता ज्ञवाली, गण्डकी प्रदेशमा तोयाराज अधिकारी, लुम्बिनी प्रदेशमा अर्जुन अधिकारी, कर्णाली प्रदेशमा श्यामबाबु गौतम र सुदूरपश्चिम प्रदेशमा डा। कृष्ण भेटुवाल तोकिएका छन् ।

सम्पादन समितिले तीन वटा विशेष उपसमिति गठन गरी केन्द्रीय कार्यालयबाट डेस्क सञ्चालन गर्ने निर्णय गरेको रास्वपाले जनाएको छ । गठन गरिएका उपसमितिमा आन्तरिक समन्वय उपसमिति, प्रशासनिक समन्वय उपसमिति र सञ्चार समन्वय उपसमिति छन् ।