काठमाडौँ । नेपाल उद्योग वाणिज्य महासंघका अध्यक्ष चन्द्रप्रसाद ढकालले महासंघले उद्यमी, व्यवसायी र अर्थतन्त्रको समस्या समाधानमा ुट्रबलसुटरु को काम गरिरहेको बताएका छन् । नेपाल विद्युतीय व्यवसायी महासंघको १६औँ वार्षिक साधारणसभा तथा छैटौँ महाधिवेशनको उद्घाटन सत्रलाई सम्बोधन गर्दै महासंघका अध्यक्ष रामचन्द्र ढकालले उद्यमी तथा व्यवसायीका समस्या समाधानका लागि निरन्तर सक्रिय रहेको बताएका हुन् ।

अध्यक्ष ढकालका अनुसार उद्योग क्षेत्रका श्रमसम्बन्धी चुनौतीदेखि लिएर डेडिकेटेड तथा ट्रंकलाइनसम्बन्धी विवादसम्मका विषयमा महासंघले निरन्तर पहल गर्दै आएको छ । लगानीमैत्री वातावरण बनाउन कानुन संशोधन, उच्चस्तरीय आर्थिक सुधार सुझाव आयोगका सिफारिस तथा कालोबजारी ऐन संशोधन जस्ता मुद्दामा समेत महासंघले सरकारसँग निरन्तर संवाद र सहकार्य गर्दै आएको उनले बताए ।

लामो समयदेखि अल्झिएको डेडिकेटेड तथा ट्रंकलाइन विवाद समाधानका लागि आफूले प्रधानमन्त्री सुशीला कार्की र ऊर्जामन्त्री कुलमान घिसिङसँग गरेको आग्रहलाई सरकारले गम्भीरतापूर्वक लिएर पहल थालेको उल्लेख गर्दै अध्यक्ष ढकालले सरकारप्रति आभार व्यक्त गरे।

उनले देशमा उत्पादन वृद्धि र रोजगारी सृजनाका लागि ठूलो मात्रामा स्वदेशी तथा विदेशी पुँजी आवश्यक रहेको उल्लेख गर्दै साना लगानीका स्रोतहरू सङ्कलन गरी ठूला तथा बहु आयामिक परियोजनामा लगानी बढाउनुपर्ने आवश्यकता औँल्याए । यस उद्देश्यसहित महासंघको नेतृत्वमा अन्य निजी क्षेत्रका संघसंस्था तथा उनीहरूका सदस्यहरूको सहभागितामा १० अर्ब रुपैयाँ पुँजीसहित नेपाल डेभलपमेन्ट पब्लिक लिमिटेड स्थापना गरिएको जानकारी दिए।