तोकिएको मितिमा चुनाव नभए प्रतिनिधिसभा पुन: स्थापना हुनुपर्छ : प्रवक्ता महत

काठमाडौँ । नेपाली कांग्रेसका प्रवक्ता डा। प्रकाशशरण महतले अन्तरिम सरकारले समयमै निर्वाचन गराएर नयाँ संसद् गठन गर्न नसके विघटित प्रतिनिधिसभा पुन स्थापना गर्नुपर्ने बताएका छन् । उनले निर्वाचन ढिलाइ हुँदा संवैधानिक अन्यौल बढ्ने भन्दै त्यसबाट जोगिन वैकल्पिक बाटो अपनाउनुपर्ने धारणा राखे ।

नेपाल राष्ट्रिय दलित समाज कल्याण संघको ४३औँ वार्षिक साधारणसभाको उद्घाटन समारोहमा बोल्दै प्रवक्ता महतले निर्वाचन नै पहिलो प्राथमिकता भएको स्पष्ट गरे ।

‘निर्वाचनबाट संसद् बनाउनु पर्‍यो। त्यो सरकारले सक्दैन भने संसद् पुनस् स्थापनाबाट हुनुपर्छ भन्ने मलाई लाग्छ,’ उनले भने, ‘अहिलेको स्थिति यही हो।’ उनले सरकारले २१ फागुनमा निर्वाचन गर्नुपर्नेमा जोड दिँदै नेपाली कांग्रेस त्यसका लागि तयार रहेको बताए । ‘जनताले जे म्यान्डेट दिन्छन्, जनताको जे इच्छा हुन्छ, त्यो इच्छा संसदमा प्रकट हुन्छ,’ महतले भने, ‘त्यो संसद्ले आवश्यक सुधारदेखि संवैधानिक सुधारका विषयहरू अघि बढाउँछ ।’

उनका अनुसार २१ फागुनमा निर्वाचन हुन नसके संसद् पुनस् स्थापनाको प्रक्रिया अघि बढ्नेछ । ‘अब होइन भनेदेखि संसद पुन स्थापनाको बाटोमा जान्छ । संसदले सरकार बनाउँछ,’ उनले भने, ‘त्यसले फेरि चाँडै निर्वाचन गर्छ । ०८४ सम्म कुर्नुपर्दैन, २०८३ मै निर्वाचन हुन्छ ।’ संवैधानिक संरचनामा लामो समयसम्म शून्यता रहनु खतरनाक हुने उल्लेख गर्दै उनले छिमेकी देश बंगलादेशको पछिल्लो अवस्थाबाट नेपालले पाठ सिक्नुपर्ने बताए ।