काठमाण्डौँ । वरिष्ठ पत्रकार ज्ञानमणि नेपाल कालोटोपीको सम्पादनमा प्रकाशित पहिलो पुस्तक डा. सत्यमोहन जोशी, डा. इन्दुल केसी र दुई थुँगा फूल’ शनिबार एक विशेष समारोहबीच सार्वजनिक गरिएको छ ।

शब्दयात्रा प्रकाशनले बनेपास्थित आफ्नै सभाहलमा आयोजना गरेको कार्यक्रममा पुस्तकका लेखक वरिष्ठ साहित्यकार अरुणबहादुर खत्री ‘नदी’ र सम्पादक ज्ञानमणि नेपाल कालोटोपीले संयुक्त रूपमा पुस्तकको लोकार्पण गर्नुभएको हो ।

शब्दयात्रा प्रकाशनका अध्यक्ष हरि मञ्जुश्रीका अनुसार २०६८ सालमा स्थापना भएको संस्थाले साहित्य, पत्रकारिता तथा सिर्जनात्मक क्षेत्रलाई प्रोत्साहन गर्ने उद्देश्यका साथ हालसम्म २८३ वटा पुस्तक प्रकाशन गरिसकेको छ । संस्थाले हरेक वर्ष पुस्तक प्रकाशनसँगै विभिन्न विधामा योगदान पुर्‍याउने स्रष्टाहरूलाई सम्मान गर्ने परम्परालाई पनि निरन्तरता दिँदै आएको छ ।

सम्पादक ज्ञानमणि नेपाल कालोटोपी काभ्रेपलाञ्चोकको मण्डनदेउपुर नगरपालिका–१० निवासी हुनुहुन्छ। उहाँ दुई दशकभन्दा बढी समयदेखि पत्रकारिता क्षेत्रमा सक्रिय रहँदै आउनुभएको छ। विभिन्न सञ्चारमाध्यममा अनुभव बटुलिसक्नुभएका उहाँ हाल नेपाल पत्रकार महासंघ काभ्रे शाखाका कार्यसमिति सदस्य, ८मध्यमार्ग साप्ताहिक८का सहसम्पादक तथा कालोटोपी डटकमका सञ्चालक एवं सम्पादकका रूपमा कार्यरत हुनुहुन्छ । उहाँका थप कृतिहरू पनि प्रकाशनको तयारीमा रहेका जनाइएको छ।

यसै अवसरमा शब्दयात्रा प्रकाशनले साहित्य, पत्रकारिता तथा सामाजिक क्षेत्रमा उल्लेखनीय योगदान पुर्‍याएका आठ जना व्यक्तित्वलाई सम्मान गरेको छ। सम्मानित हुनेहरूमा केदार शाक्य, राममणि दुङ्गेल, नीरा अधिकारी, विवश पोखरेल, सन्ध्या पहाडी, अरुणबहादुर खत्री ‘नदी’, पासाङ दोर्ची शेर्पा र पूर्णबहादुर कर्माचार्य रहनुभएको छ। कार्यक्रमको सञ्चालन कालिका त्रिपाठी पन्तले गर्नुभएको थियो। अध्यक्ष हरि मञ्जुश्रीले संस्थाले आगामी दिनमा पनि साहित्यिक गतिविधि, पुस्तक प्रकाशन तथा स्रष्टा सम्मानलाई निरन्तर अघि बढाउने प्रतिबद्धता व्यक्त गर्नुभयो।